கங்குவா திரைப்பட சண்டை காட்சியின் போது ஏற்பட்ட விபத்தில் நடிகர் சூர்யா காயமடைந்துள்ளதாக தகவல் வெளியாகியுள்ளது.
நடிகர் சூர்யாவின் நடிப்பில் உருவாகும் ‘கங்குவா’ திரைப்படம் மிகுந்த எதிர்பார்ப்பை ஏற்படுத்தியுள்ளது. சிறுத்தை சிவா இயக்கத்தில் உருவாகும் இந்த படத்தில் நடிகர் சூர்யா 5-க்கும் மேற்பட்ட வேடங்களில் நடித்து வருகிறார். இந்த படத்தில் பாலிவுட் நடிகை திஷா பதானி கதாநாயகியாக நடிக்கிறார். மேலும் இந்த படத்தில் யோகி பாபு, கோவை சரளா, நட்ராஜ் உள்ளிட்டோர் முக்கிய கதாபாத்திரங்களில் நடித்து வருகின்றனர். இந்த படத்திற்கு தேவி ஸ்ரீ பிரசாத் இசையமைத்து வருகிறார். யூவி கிரியேஷன் மற்றும் ஸ்டுடியோ கிரீன் நிறுவனங்கள் தயாரிக்கிறது. இந்த படம் முழுக்க முழுக்க 3டி தொழிற்நுட்பத்தில் உருவாகி வருகிறது. ஃபேண்டஸி கதைக்களத்தில் உருவாகும் இந்த படத்திற்கு ஏராளமான அனிமேஷன் காட்சிகள் இடம்பெற உள்ளது. இந்த படம் 1500 ஆண்டுகளுக்கு முன்பு நடக்கும் கற்பனை கலந்த கதைக்களம் கொண்ட படமாகும். 38 மொழிகளில் கங்குவா படத்தை வெளியிட இருப்பதாக தகவல் வெளியாகியுள்ளது.
இந்நிலையில், கங்குவா திரைப்பட சண்டை காட்சியின் போது ஏற்பட்ட விபத்தில் நடிகர் சூர்யா காயமடைந்துள்ளதாக தகவல் வெளியாகியுள்ளது. சென்னை பூந்தமல்லி அருகே கங்குவா திரைப்பட சண்டை காட்சியின்போது கேமரா அறுந்து சூர்யாவின் தோள்பட்டையில் விழுந்ததாகவும், இதில் அவர் காயமடைந்ததால் உடனடியாக சிகிச்சையளிக்க மருத்துவமனைக்கு அழைத்துச் செல்லப்பட்டதாகவும் கூறப்படுகிறது. எந்த அளவுக்கு காயம் ஏற்பட்டது மற்றும் அவரது உடல்நிலை குறித்து உடனடியாக எந்த தகவலும் வெளியாகவில்லை.
