தமிழ்நாடு அரசு பணியாளர் தேர்வாணையம் என்று சொல்லப்படும் டிஎன்பிஎஸ்சி மூலம் அரசு பணிகளுக்கான அதிகாரிகள் மற்றும் அலுவலர்கள் தேர்வு செய்யப்பட்டு வருகிறார்கள். கடந்த 2020ஆம் ஆண்டு ஜனவரி 20ஆம் தேதி குரூப் 1 தேர்வுக்கான அறிவிப்பு வெளியிடப்பட்டது.
துணை ஆட்சியர் ,காவல்துறை துணை கண்காணிப்பாளர், வணிகவரி உதவி ஆணையர், கூட்டுறவு சங்க துணை பதிவாளர் உள்ளிட்ட காலியாக உள்ள பணியிடங்களுக்கு டிஎன்பிஎஸ்சி குரூப் 1 முதல்நிலை தேர்வு கடந்த ஜனவரி மாதம் நடத்தப்பட்டது.
அத்துடன் குரூப்-1 முதன்மைத் தேர்வுகள் மார்ச் 4, 5 ,6 ஆகிய தேதிகளில் நடைபெறும் என்றும் சென்னை மையத்தில் மட்டும் இத்தேர்வுகள் நடைபெறும் என்றும் தெரிவிக்கப்பட்டது. டிஎன்பிஎஸ்சி குரூப் 1 முதல் நிலை தேர்வுமூலம் 3 ஆயிரத்து 800 பேர் தேர்வு செய்யப்பட்டனர். இருப்பினும் கொரோனா பரவல் காரணமாக முதன்மை தேர்வு நடத்துவதில் தாமதம் ஏற்பட்டது.
இந்நிலையில் சென்னையில் இன்று முதல் 3 நாட்களுக்கு டிஎன்பிஎஸ்சி குரூப் 1 முதன்மை தேர்வு நடைபெறுகிறது.தேர்வு எழுதுவதற்கு அனுமதிக்கப்பட்ட விண்ணப்பதாரர்கள் நுழைவுச் சீட்டுகளை தேர்வாணையத்தின் இணையதளத்தில் இருந்து பதிவிறக்கம் செய்து கொண்ட நிலையில் இன்று தேர்வு நடைபெறுகிறது. 66 பணியிடங்களுக்கு நடக்கும் இந்த தேர்வை, முதல் நிலை தேர்வில் வென்ற 3,800 பேர் எழுதுகின்றனர்.
