சுவையான.. பூசணிக்காய் பொரியல்

by Web Team
0 comment

மதிய வேளையில் சாப்பாட்டுக்கு என்ன பொரியல் செய்வதென்று தெரியவில்லையா? உங்கள் வீட்டில் மஞ்சள் பூசணிக்காய் உள்ளதா? அப்படியானால் அதைக் கொண்டு பொரியல் செய்து சாப்பிடுங்கள். மஞ்சள் பூசணியை ஒருவர் அடிக்கடி உணவில் சேர்ப்பது மிகவும் நல்லது. ஏனெனில் அதில் வைட்டமின் ஏ அதிகம் உள்ளது. அதோடு, ஆன்டி-ஆக்ஸிடன்ட்டுகள் அதிகம் நிறைந்துள்தால் நாள்பட்ட நோய்களின் அபாயத்தைக் குறைக்கும். மேலும் இதில் வைட்டமின்கள் அதிகம் இருப்பதால், நோயெதிர்ப்பு சக்தி மேம்படும்.

குறிப்பாக மஞ்சள் பூசணியில் நார்ச்சத்து அதிகம் உள்ளது. இது செரிமானத்தை தாமதப்படுத்தி, நீண்ட நேரம் பசி எடுக்காமல் வயிற்றை நிரப்பி வைத்திருக்கும். இதில் கலோரிகளும் மிகவும் குறைவு என்பதால் உடல் எடையைக் குறைப்போருக்கு மிகச்சிறப்பான காய்கறி.

உங்களுக்கு மஞ்சள் பூசணிக்காயைக் கொண்டு எப்படி பொரியல் செய்வதென்று தெரியாதா?

அப்படியானால் இக்கட்டுரையைத் தொடர்ந்து படியுங்கள்.

தேவையான பொருட்கள்:

* மஞ்சள் பூசணிக்காய் – 1 கப் (நறுக்கியது)

* வெங்காயம் – 1

* பச்சை மிளகாய் – 3

* துருவிய தேங்காய் – சிறிது

* கடுகு – 1 டீஸ்பூன்

* உளுத்தம் பருப்பு – 1 டீஸ்பூன்

* சீரகம் – 1 டீஸ்பூன்

* பெருங்காயத் தூள் – 1 சிட்டிகை

* மஞ்சள் தூள் – 1 சிட்டிகை

* உப்பு – தேவையான அளவு

* கறிவேப்பிலை – சிறிது

* எண்ணெய் – 1 டேபிள் ஸ்பூன்

* தண்ணீர் – சிறிது

செய்முறை:

* ஒரு வாணலியை அடுப்பில் வைத்து, அதில் எண்ணெய் ஊற்ற வேண்டும்.

* எண்ணெய் சூடானதும், அதில் கடுகு, உளுத்தம் பருப்பு, கறிவேப்பிலை, பெருங்காயத் தூள் சேர்த்து தாளித்துக் கொள்ளவும்.

* பின் அதில் பச்சை மிளகாயை கீறிப் போட்டு வெள்ளையாகும் வரை வதக்க வேண்டும்.

* அதன் பின் வெங்காயத்தைப் போட்டு, சிறிது உப்பு தூவி சிறிது நேரம் வதக்க வேண்டும்.

* பிறகு மஞ்சள் பூசணியை சேர்த்து ஒருமுறை வதக்கி விட வேண்டும்.

* பின்பு மஞ்சள் தூள், தேவையான அளவு உப்பு மற்றும் சிறிது நீர் தெளித்து ஒருமுறை கிளறி விட்டு, மூடி வைத்து 10 நிமிடம் மென்மையாகும் வரை வேக வைக்க வேண்டும்.

* இறுதியில் அதில் சிறிது துருவிய தேங்காயை சேர்த்து பிரட்டி இறக்கினால், சுவையான பூசணிக்காய் பொரியல் ரெடி!

Related Posts

Leave a Comment